¿Como se integran lingua e emoción no trazado mnemotécnico cando se leva a cabo a recuperación reconstrutiva? Recordar na primeira lingua versus na segunda, ¿afecta ao sentir das lembranzas? Nun estudo que analiza os tipos de información activados durante a procura de recordos, Schrauf (2003) atopou que, cando os participantes seguían unha cadea de asociacións en resposta a certas entradas, moi frecuentemente evocaban imaxes visuais (66%) vs. asociacións verbais (17%), sensitivas (13%) ou conceptuais (29%). Dado que se sabe que as imaxes son un factor central no revivir mental de acontecementos pasados, este artigo examina a interrelación das imaxes coa emoción e mais a lingua na memoria autobiográfica bilingüe. Trinta falantes de español e inglés, inmigrantes portorriqueños nos Estados Unidos, clasificaron de maneira detallada recordos nas dúas linguas, visual, emocional, auditiva e linguisticamente. As análises de proporcións multidimensionais probaron que o detalle visual e mais a intensidade emocional se agrupaban xuntos, e suxeriron que contribúen de maneira conxunta cando se reviven acontecementos pasados. A comparanza das lembranzas dos bilingües en español vs. inglés mostrou unha intensidade de imaxes e emocións meirande nos recordos da segunda lingua (inglés) ca nos da primeira lingua (español). A nosa suxestión é que as lembranzas en inglés son máis recentes, máis novidosas e requiren máis esforzodespois- do-significado (Bartlett, 1932) cós recordos en español e que, xa que logo, se traen á memoria cun maior detalle nas imaxes e na intensidade emocional cás lembranzas en español.